تومروس-ون آمریکا سس یندن آلدیغی معلوماتا گؤره ایرانین پرزیدنتی، محمود احمد نژاد، آمریکا اجتماعیتی نی ئوز فکری لری ایله تانیش ائتمک مقصدی ایله بو گون ایکی تدبیرده اشتراک ائتدی و ائده جک. احمدی نژاد نیویورک دان واشینگتن دا کی ژورنالیست لرله ویدئو کنفرانیس کئچیره جک و کلمبیا دانشگاهی نین ئوره نجی لری قارشی سیندا نطق ائتدی.

احمدی نژاد کلمبیا دانشگاهینا آیاق قویان کیمی یوزلر نفر شعار وئردی لر "گئت جهنم اول!" یا "ئولوم دیکتاتورا!" لاکن احمدی نژاد گولومسنه رک اونلاری آلقیشلادی! کلمبیا دانشگاهی نین رئیسی "لی بولینجر" احمدی نژادا بیلدیردی کی شعارلار اونون حاققیندا نه دیر. سونرا بیلینجر دئدی سنین کیمی آدامین بورا گلمه یی "مسخره" دی. چونکو سن هولوکاستی داناراق ئوزونو سه رییب سن. هولوکاست فاجعه سی دونیا اوزرینده بیر سندلی فاجعه دیر کی بوتون سندلری حاضیردی. احمدی نژاد اونون جاوابیندا دئدی کی بو بیر دوستلوق گوروش دئییل. سیز ئوز دولتی نیزین تاثیرینده سیز. او سئوال - جاواب برنامه ده دئدی کی هولوکاست دوزگون اولسادا بونون فلسطینه نه دخلی وار؟ اسرائیل نه اوچون فلسطین خالقینی بئله اینجیدیر؟

       لی بولینجر
احمدی نژاد علاوه ائتدی کی او اروپا محقق لرینی حمایت ائدیر کی هولوکاستی سئوالا چکیب لر. اونون نظری بیر نئچه اروپالی آدام لاردیلار کی هولوکاستی دانمایاراق تلفاتی نین سایی نی سئوالا چکیب لر و تازالیقدا تهران دا بیر کنفرانس دا اشتراک ائتمیشدیلر.

احمدی نژاد بولینجرین سئوال لارینا جاواب وئرمه دی، لاکن بیر نئچه دقیقه قرآن و مذهب باره دانیشیدی و امریکانین سیاستیندن انتقاد ائتدی و حتی هیروشیما و ناکازاکی بمباردمانی نی آریا گتیردی. او عین حالا بیر ئوره نجی نین سئوالیندا ایران دا هموسکسوئل انسان لارین ئولدورمه یی نی داندی و حتی دئدی کی ایران دا اصلا هموسکسوئل یوخدور. ایرانی روزنامه لری خبر وئریب لر کی ان آزی 90 نفر ایرانلی هموسکسوئل ایندیه قدر ایران دا ئولوم جزاسینه محکوم اولوب.

پرزیدنت بوش فاکس نیوز برنامه سینده دئدی کی اگر بولینجر بئله بیلیر کی احمدی نژادین اوردا دانشیغی ئوره نجی لر اوچون خئیری وارسا، اونو تایید ائدیر. بوش قید ائتدی کی بو آمریکانین بویوک لیی نی گوستریر.

احمدی نژادین یولوندا مین لر نفر شعار اللرینده اونو و اونون سیاستی نی محکوم ائتمیشدی لر. اونلارین ایچینده یهودی لر و ایرانلی مخالف گروه لار گورسه نیردی.

ایرانین های هوی چی پرزیدنتی بازار گونو آمریکایا یئتیشدی و قرار اولوب کی ب م ت نین ایل لیک اجلاسیندا چارشنبه آخشامی چیخیش ائتسین. ئونجه ده ایران پرزیدنتی 60 دقیقه برنامه ده، ABC شبکه سینده بیر مصاحبه ده دئمیشدیر کی ایرانین نؤوه سلاحینا احتیاجی یوخدور و اینانمیر کی آمریکا دولتی ایرانا نظامی حمله ائده جک.